Bagyo

Ibinubuhos ng langit
Ang malamig nitong parusa
Panginginig ang tanging naisagot
Sa paghagupit ng matatalim na buga
Sinubukan kong tumingala
Subalit ang langit sa aki'y dumura
Kasabay ng pag-itim ng kalawakan
Inuusig ang aking gunita
Mga ala-alang sumusuntok,
Kumukurot at nan-dadagok
Inuukit ng kidlat
At ibinubulyaw ng kulog
Ang mapait kong kapalaran
At ang naglalaho kong pag-asa
Aagos ang dusa
Malayo pa ang umaga
Sa ilalim ng madilim na alapaap
Ako ay nag-iisa.